謝浩文助陣伴唱

ERROR與人形貓拍MV

香港男團ERROR推出本年度首支新歌，歌曲以寵物為題，主題除了人與人之間的承諾之外，人與寵物的承諾亦很重要，帶出不要棄養寵物的訊息。

ERROR四子包括肥仔（梁業）、阿Dee（何啟華）、193（郭嘉駿）及保錡（吳保錡）日前齊齊為新歌《I Promise》拍攝MV。期間四子更落區到鬧巿取景拍攝，吸引不少巿民圍觀。

在MV中，ERROR跟多隻“人形貓”拍攝，不乏流露輕鬆惹笑本色的場口。ERROR四子更要不斷搞笑重複點頭動作，難怪他們表示今次MV拍攝非常疲倦，名副其實笑到牙骹軟。193就笑言：“呢個MV真係好似邪教，全日都係咁笑同點頭。”肥仔則表示今次MV是萬能Key，跟任何一首歌曲都可以配對。除了點頭之外，問到今次拍攝過程可有難忘的事？肥仔表示難忘落區：“今次我哋係去好熱鬧的地方拍攝，感覺都幾尷尬，因為好多人圍觀，幾大壓力。”

今次MV以貓為題，問到四子之中有否“貓奴”？阿Dee即表示：“一定係193，當佢畀一大堆貓圍住時，佢會變成貓奴，郁都唔敢郁、瘋狂咁尖叫。”原來193非常驚貓，他坦言：“如果今個MV用真貓，我會唔拍，好彩係用假貓。”

今次亦是保錡宣佈停工前拍攝的最後一個MV。此外，新歌班底由《我們不碎》班底組成，謝浩文編曲及監製、周耀輝作詞。ERROR表示謝浩文更為歌曲伴唱，笑言希望歌曲能夠在各大電台頒獎禮得獎，屆時就可以邀請謝浩文一齊上台唱歌。