苑瓊丹生意蝕做老公包底

苑瓊丹日前為旗下熟餸包品牌舉行展銷活動，苑老闆向在場同事豪派利市，為展銷活動打響頭炮。苑仔話現時忙於生意投資、拍攝網片等工作，靜候疫情平穩再計劃北上搏殺：“之前大家都話我疫情期間不停投資好勇，其實我真係得個勇字，有贏有輸啦！唔通輸咗我又話畀人聽咩？其實上年十二月左右，我同朋友夾份開咗間美容院，點知第四波殺到，未開張已經要停業啦，蝕咗幾個月租，依家放寬限聚令，終於見到曙光啦！”

苑仔笑言蝕錢濕濕碎，全因老公無底線支援，令自己放心向前衝：“蝕幾多咪問佢攞返囉，因為佢畀咗好大信心我，我先咁勇周圍做生意，可能佢覺得我忙啲唔洗成日煩住佢？哈哈，不過佢Sweet我係感受到嘅。”為回報老公的甜蜜支持，苑仔留港時煮兩味畀老公品嘗：“其實我煮嘢食都幾叻架，所以先做飲食生意之嘛！”