被麥玲玲批桃花旺

姚子羚避談與男友復合

陳山聰與姚子羚昨日出席節目記招，麥玲玲叫子羚唔使擔心姻緣，更送上桃花口罩及催旺掛飾；林盛斌亦表示要介紹醫生朋友給子羚，場面搞笑。

陳山聰、姚子羚、林盛斌及麥玲玲前晚出席《師父有請》節目記招。節目邀請不同星級嘉賓亮相，以玄學角度大談流行話題。麥玲玲批算單身的子羚有桃花，更指她“寶物沉歸底”，唔驚嫁唔出。之前介紹醫生畀朱慧敏、成功令女方嫁得出的林盛斌，表示會介紹醫生朋友給子羚，場面搞笑。

新年將至，姚子羚透露會與“胡說八道會”一班好姊妹到胡蓓蔚家中團拜。她說：“每年都會去佢屋企 利市，非常唔知醜，亦畀佢哋鬧咗好多年。”山聰隨即揶揄她：“施嬅都搞掂啦，你快啲啦！”子羚就說：“感情事隨緣！”談到施嬅於日前宣佈婚訊，子羚表示戥好友高興。問到是否一早獲悉？她說：“之前知佢訂婚，但唔知佢幾時公佈婚訊。（有冇見過施嬅老公？ ）我哋都見過，亦認識佢。對方係一個事業有成、認真工作同心地善良嘅人，識講廣東話同英文。最重要是對施嬅很好，希望他們快生BB！”

不少人看好子羚和黃智雯接施嬅棒，成為“胡說八道會”第四位結婚的成員，之前跟夜店董事男友Raymond傳復合的子羚就笑說：“可能係胡定欣搶先，我自己真的冇去想。希望胡說八道會姊妹都好，可能是愛情、或者演藝工作、又或者做生意。”說到今年情人節如何過？子羚就避談，指當日也剛好是年初三，想跟家人一起打麻將。

首年與兒子度歲的山聰，表示最近等新劇開拍，所以有時間準備過年。但因應疫情關係，不會帶囝囝外出拜年：“太太封閉式居家，唔畀個仔出街，除非出去打針。小朋友唔可以戴口罩，出街都危險，所以今年媽媽會嚟我屋企拜年。（準備家庭新年裝？）唔會，本來以為新年好凍，準備咗件棉襖畀佢，點知原來新年好熱，好在子羚送咗件衫仔啱晒佢。”

剛與施嬅拍完《金宵大廈2》的山聰，坦言完全不知道對方婚訊：“連佢拍拖都唔知，收得好密，都係睇社交網先知，即刻同佢求證，佢一定行大運啦。其實《金》劇好旺我哋，拍第一集時我結婚，依家拍第二集就輪到佢，等她回來後再慶祝。希望佢快啲生小朋友，咁就可以同我個仔一齊玩啦！”