一齊開心險勝開齋

國金駒愈贏愈容易

上周兩仗戰果利冷，周五賽事大熱門僅一匹“力奇神箭”勝出，其餘無一倖免，熱門客損手居多。今季夜馬例爆冷，馬少場合熱門必叮，賽果令人難以捉摸。騎師輪流搵食，華將兩日共贏六場，整體成績不俗。紅人張志立勝出“柏雪之寶”及“康泰無敵”現累計十九場頭馬，比高君濤少一場，排名居次席，成績追貼，今季爭冠軍有力挑戰對手。

練者陣營華倉最威，兩日取十場頭馬，成壟斷局面。錢健明上周五憑“一齊開心”及“國金駒”起個冷孖，翌日“康泰無敵”再添一場，現有二十二場頭馬，龍虎榜上續領風騷。

“一齊開心”服役後屢拼不逞，上次易配田中正一埋門險勝，替馬匹取得來澳勝果，騎者發揮得宜受幕後稱讚。錢健明部署此駒開齋亦居功。“一齊開心”沙地最佳出路，但質素不高，勝在有速度，跑短途放順隨時帶到。下次升班減磅仍可吼。

廄友“國金駒”上仗蝕分出戰，續由田中正一操刀，借輕磅之助，出閘以快打慢，全程領放直帶到尾，贏來猶有餘勁。“國金駒”上季三十七分起步，由五班贏上三班仍有餘未盡。此駒今季大放異彩，六戰共取四冠一亞，愈戰愈勇。馬匹跟得鬥得，且鬥心旺盛，已成馬房一顆新星。錢健明今季兵雄將勇，除倉口馬多，騎師有日將田中正一作出擊箭頭，此子近期儼如主帥頻替錢廄贏馬。加上徒弟張志立幫手，憑着廄內上下一心，重奪冠軍寶座指日可待。