朱紫嬈新歌透視欺凌與自卑

歌手朱紫嬈(Khole)昨日為新歌《怪 · 誕》舉行發佈會，並預告六月會推出紀念出道十周年新EP。至於紀念個唱，她指原定去年五月開騷，但受疫情影響，最後都要撻訂：“好想再重開，但未知幾時，要再睇情況，稍後會開多啲Live。”

新歌歌詞帶出不要自卑、不要自我否定的訊息，朱紫嬈指靈感來自小學五年級時發現有家族遺傳性脊椎側彎，治療期間遭受同學杯葛及排斥的事，她表示當年非常自卑，憶述往事時更不禁哽咽：“做健康檢查發現之後即刻治療，需要在腰間帶上一個好硬、好似盔甲的矯形器，每日出街都似去打欖球咁。同學會用奇異眼光望我、會杯葛我，成日畀人恰。中一時候老師畀個Locker我放東西，同學就扑爛個Locker，仲掉晒我的書，真係好唔開心！”

Khole表示矯形過程持續幾年，但最後都失敗，需要做手術調整脊椎，術後留下一條長疤痕。她形容似“劏豬”：“開刀時係由頸下一路開到Pat Pat上面，成日都記住背後有條疤，搞到好有自卑感。”是否因為有疤而不着泳裝？她笑說會照着，但會加料：“兩件頭的話，外面再着件好透的T恤、背心，從來都冇勇氣除低。”