封帝封后夠運而已

豪氣縱橫的鑽石級數司儀 Do姐，主持頒奬禮順風順水，未料兩遇考牌，被窒住條中氣。有此功力者：資深影帝姜大衛、廚功了得的李家鼎。

Do姐問姜大衛：“John哥，你競逐最佳男配角奬有沒有信心？”“我對自己沒有信心，對其他四位有信心。”點解對自己冇信心？John哥胸有成竹：“總之，我對自己冇信心啦。”Do姐唔識接話茬，走人。熒幕前面有人喃喃自語：前輩眞係謙虛嘞。

Do姐指住山頂位的李家鼎問：“鼎爺，競逐最佳非戲劇節目獎有冇信心？”鼎爺合十，大大聲回應：“梗係有信心，成晩等到依家，冇信心還坐在這裡麼？”Do姐又愕然，搭不上嘴，木然走人。

萬千星輝中，靈光一閃的，是雙料視帝王浩信的謝詞：我好運氣而已！

回憶起香港金融區一個小故事，太子爺學成接管家族生意，拉了一位班中榮譽畢業的高材生做伙記。對方辦事能力出衆，但太子爺經常施以下馬威，以抬高自己；伙記仔忍無可忍了，拍檯回擊：“你有甚麼叻過我，好運而已。”

王浩信再次榮膺視帝，居然能明白“運氣”而已，前途無量。世界影視仍運行着千古未移的風氣：重文輕武！“洛奇”、“蘭保”，銀幕上打遍天下，一人對一支軍隊的演員史泰龍，得過奧斯卡影帝沒有？成龍曾點名：“我打生打死都冇份；梁朝偉笑吓，咁又得咗。”

電視打戲不斷，招式越來越亮麗。“我練到斷手指，一日練功十二小時。”龔嘉欣演《殺手》搏到盡，只能馬來西亞封后，異地觀眾口味有別。蔡思貝獲“最佳女主角”大獎，着靚衫靠口若懸河搵食的大律師，千祈唔好講打，犯法的。

《殺手》打得厲害，黎耀祥苦練成打仔，竟然唔夠一個盲仔打，“王浩信擊敗黎耀祥”，説法不對，各有運氣而已。

高 梁