龔嘉欣捧走兩大獎

龔嘉欣前晚在無線頒獎禮上以《香港愛情故事》中港女角色“邱凱琪” ，奪得最受歡迎電視女角色獎及大馬“視后”，她覺得今年成績表考得好好。龔嘉欣在一六年曾以《幕後玩家》攞過最佳女配角獎，今年以四部劇入圍角逐多個獎項，成功捧走兩個大獎。

當龔嘉欣再上台領取最受歡迎電視女角色獎時，即時變咗“喊包”，激動地說：“真係冇諗過可以再上台，好不容易，多謝投票給邱凱琪的觀眾以及公司的栽培。特別多謝對手羅天宇，其實是‘殺手’這個角色令我再突破，演起邱凱琪才得心應手。今年成績表考得好好，四部劇出街都有不一樣感覺。”她又多謝曾經“同居”的姚子羚、好姐妹陳凱琳、譚凱琪；一邊喊一邊多謝去世的爺爺；“多謝佢冇嬲我放棄學業、讓我選擇做演員，以後我會做得更好。”

張振朗以劇集《反黑路人甲》的高彬一角奪得最受歡迎電視男角色獎。上台前，振朗跟好拍檔王浩信深情擁抱，繼而多次激動落淚，抑壓不住自己情緒。他表示：“望到《反黑》兄弟姐妹上台攞獎，我都眼濕濕。好多謝佢哋多謝我，這個獎畀得我，未來日子我一定做好佢。”