個半月增減三十磅

張建聲搏殺傷身壞胃

新年新開始，張建聲在社交平台Post出一張面部輪廓“消失”、“身懷六甲”肉感非常的照片，標註了體重已超過二百磅，間中有胃痛情況，不少網友留言叮囑他小心身體。

張建聲解釋原來正為新角色努力增磅，目標由一百八十磅要增肥至二百二十磅，現在一個月時間已經有廿磅進賬：“坦白講係傷身，會易攰、眼瞓、食到胃痛胃抽筋，間中要食胃藥止痛，不過我計過，一共要增卅幾磅，唔係冇可能，三月就卅八歲，趁有能力就做咗先。”

今次新戲是新導演、新編劇班底，題材為六十至八十年代港產武俠片，阿聲飾演一個懷才不遇的導演，為人好Hea，做事求其。他說：“導演睇過我的訪問、知我做嘢方式，角色為我度身訂造，令我覺得好榮幸，睇過劇本好喜歡，值得為角色增肥。”他希望透過電影喚醒觀眾憶起香港武俠片文化，令港產片不死。

向來工作認真的阿聲，每次遇到好角色切合劇本，外型體重完全配合要求，一五年拍攝《壹獄壹世界》日飲四杯增磅奶粉，谷肥至二百磅四十吋腰，他說：“今次已經係第三次增肥，係辛苦但冇辦法，本身要做殺手係瘦嘅，但電影延期，另一部肥角色的提前拍，所以拍完又要即刻用兩個月時間落返百七磅，之前《一秒拳王》就用四十五日，由百九多磅減至一百六十七磅仲操到肌肉，所以都有信心減到。”

另外二○二一年張建聲將有新轉變，離開合作九年、一手提攜他入行的蕭定一的公司，他說：“蕭老闆畀咗好多演戲機會我，由《一路向西》、《壹獄壹世界》、《作家的謊言》等作品，特別《反黑》招積一角令到大家認識到張建聲，好感謝蕭生，佢可以話係我伯樂，好多謝佢。”