佗B照玩瑜伽嚇壞老公

原子鏸趁大肚留倩影

原子鏸日前與老公一起影孕照，雖然腹大便便，但體態依然纖瘦。她透露每日運動數小時，佗B都照玩瑜伽，初時更差點嚇壞老公。

原子鏸(Marsha)於去年九月宣佈與摩洛哥籍丈夫Mehdi El Ajimi“一索得男”，預產期將於今年三月。日前Marsha更趁大肚留倩影，拉上老公一齊影孕照。雖然腹大便便，但Marsha體態依然纖瘦，名副其實的肥肚不肥身。

懷孕超過六個月的Marsha，表示已沒有早期的妊娠不適，現時感覺良好，惟每次食飽時會有“頂住”感覺。她說：“個肚愈來愈大，食飽咗更加覺得好似頂住，唞唔到氣咁，要趴低唞吓。所以我的食量唔係特別多，同以前差不多，但晚餐唔會食太多。”

Marsha亦透露有一直做瑜伽及散步，每日差不多做兩三小時運動：“我本身喜歡做運動，唔想自己會好腫，所以日日都有運動。其實我做完瑜伽之後，發覺BB在肚裡都會郁好多，好似在我肚裡做瑜伽咁。（老公有冇支持你做瑜伽？）支持！但開始時佢都有啲驚，老師都叫我小心。”

問到產檢時有冇見過BB的樣子究竟是似爸爸定似媽媽？Marsha表示：“有照過，但只係見到BB個鼻，仲用手遮住個樣。其實我想佢似老公，想佢Man啲、想好似我老公咁鬈髮，但老公就話想佢似我會靚啲。”現時Marsha還未添置BB物品，因為屋企在一月會進行裝修。Marsha說：“都係簡單裝修，到時我會搬去另一個地方住兩星期，等裝修味冇咗就返來住。”

疫情肆虐，未知佗B的Marsha可有格外小心？她說：“都會！去完街返屋企第一時間洗手沖涼。”問到身在美國的媽媽鄭佩佩知她懷孕可有緊張？Marsha說：“媽咪冇特別緊張，不過我哋每日都會電話聯絡。佢在美國都好少出街，由二家姐照顧，我生完之後一定會帶小朋友去美國見佢。我當然想媽媽在身邊，但冇辦法啦。（媽咪有冇教補身？）媽咪話完全唔記得當年的事。（媽咪有冇幫BB改中文名？）媽咪冇要求，中文名留畀我爹哋去諗，如果唔畀爹哋改，佢會唔開心。”