華英雄新年敲勝門

二○二一年首戰周六上演，今期凈跑一次草地日馬，排位日前公佈。近日各路人馬備戰忙碌，迎接新年賽事來臨。周六各廄俱有馬上陣，新年首戰頭威頭勢，亟欲打響頭炮。練者蔡鎮威兩駒出戰，貴精不貴多，且看可贏馬否。蔡廄今季暫取一W排榜尾，成績未如理想。主因練者兵馬有限，旗下高分馬“如風”健康曾有問題，目前仍休養生息。此駒上季取三捷，替馬房省招牌，屬蔡鎮威從練佳作。廄友“金玫瑰”連季三捷評分高企，現在回氣階段，待減分後可派用場。“耀新之星”摘取兩勝四位，計成績不差，但馬匹流鼻血後未回復昔日水準。部分新馬表現亦緩進，待打磨後才可起作用。蔡廄現有十二駒，整體實力同上季差不多。每仗出馬有限，要打“因住波”。今仗兩駒參戰，要贏晒不存奢望，盼能勝出一駒算好。

第四場三四班千五米，“華英雄”再交中野省吾操刀。此雙人馬上次闖入連贏，已有過合作經驗。今次原配再戰原程擺明要拼。此駒上季草地千二米起家，成熟長進轉跑中距離尤合腳法。今季兩戰千五米不脫三甲，演出準繩。上次留後跑，鬥直路衝刺夠強。“華英雄”質新馬不斷進步，今次雖蝕分出戰，但抽到一檔好位，加上負磅輕，形勢有利。中野省吾續掌帥印，騎者今季還未開齋，恨贏馬恨到發燒，料陣上鬥志必堅。新年首仗冀敲開勝門，賽日不妨睇看高一線。