三個亞視舊人擔綱新戲

陳展鵬無緣爭視帝

陳展鵬、陳煒、袁文傑、江嘉敏、謝東閔及陳敏之等出席無線新劇造型記者會。對於與陳煒及袁文傑兩位亞視舊同事再度合作，陳展鵬表示大家經常在公司見面，一直都想再合作，更笑今次“得償所願”。

袁文傑與“煒哥”陳煒今次在新劇《黯夜守護者(暫名)》中飾演情侶，袁文傑表示入行第一套劇已跟煒哥飾演情侶，對上一次演情侶是《果欄中的江湖大嫂》。煒哥表示上次是她很冧袁文傑，今次則是她冷落對方：“我在劇中查案大過天，成日冷落佢，要求親熱都被我拒絕。”煒哥在劇中演一位單身媽媽，有一個十四歲的兒子。她大讚“兒子”好靚仔，但大家還未熟絡，有少少代溝。問到煒哥現實生活中跟男友的女兒可有溝通時？她坦言“冇接觸”。

日前新婚的袁文傑，被問到婚後生活跟以前可有不同？他笑說：“冇諗咁多，因為每日都要開工。其實冇太多改變係最好，依家相處形式亦差唔多。當然，身份唔同咗，兩個人相處都係學問，我哋一向都會輪流做家務，（同太太之間稱呼有冇唔同？）最初聽到佢叫老公都要適應吓，但個心都係好甜。”

今年未有劇集入圍角逐無線台慶頒獎禮獎項的陳展鵬，被指是無線為王浩信鋪路再做視帝，臨時抽起他主演的劇集，故他會缺席台慶頒獎禮。昨日展鵬說：“我未收到公司通知，如果公司想我出席，我都想出席。其實我都已經兩年冇出席，因為我冇劇播出；所以今年都應該唔會出席，等下年先。”他表示兩年冇劇播出沒有唔開心，反而認為是一個良性現象：“莫講話觀眾，如果一年有三、四套劇出街，我有時都覺得好悶，角色亦好難有大發揮。呢兩年畀我靜吓，觀眾可以多啲選擇；依家我又開始拍劇，明年又多些作品，公司又可以棒新人，係好事。”他笑言有時都有街坊問他為何沒有劇播出，以為他結婚生小朋友後上岸不拍戲。

已育有一女的展鵬，日前被拍到與老婆單文柔去睇中醫，因而被指補腎追仔。他笑說：“其實這些相係年幾前影的，當時都唔使戴口罩，我只係帶老婆去睇中醫調理身體。（想追仔？）短期內唔會。（使唔使補腎生仔？）我就唔使，我又唔係咩大家族，要生好多。”他亦笑言睇到雜誌封面都有衝動生多個：“因為疫情期間，見到個女在屋企好悶，所以依家會順其自然。如果生都係呢段時間，因為再過十年就未必會生。唔係身體問題，係怕冇時間同能力和小朋友玩。”

江嘉敏日前在社交平台上載被電競公司高層男友Anthony“公主抱”的甜蜜合照，公開放閃。昨日被問放閃一事？江嘉敏笑說：“因為係男友三十歲生日，所以送個甫士畀佢，若平時在我的社交網出現要收錢。我感覺好甜，但男友就建議我要減肥， 因抱起我時，見佢個樣都有少少猙獰，張相NG了十幾次。”

會否聽男友建議減肥？江嘉敏表示會：“因為之前《食腦喪B》監製都話我影大頭時個頭大到似足球，所以要減。其實已減咗十幾磅，但監製話我面部多肉，最好唔好成日笑，但新劇角色係反社會人格，所以都要少啲笑容。”她表示有上網睇很多戲，參考如何演繹新劇角色，更為此報名上戲劇堂學演戲。