差利難過美人關

差利卓別靈，名重一時之幽默大師，其作多成默片經典。造型滑稽，天不怕地不怕，連不可一世的希魔亦敢擺之上枱，《大獨裁者》中嘻笑怒罵，希特勒吹佢唔脹。前無古人，恐亦後無來者。

當年和路迪士尼欲開拍首部長篇卡通《白雪公主》，因屬首創，無人睇好，迪士尼心大心細。差利以其盛名力排眾議，畀埋市場資料，全力撐之。片成，全球哄動，破晒紀錄，竟成迪士尼公司招牌傑作。

經此一役，迪士尼扶搖直上，成為日後卡通片之王。然差利好人難做，其後遭政府誣陷係共產黨，迪士尼竟落井下石，在國會指證，差利遂被驅逐出境，唯有長居瑞士。如斯和路迪士尼，反骨之至。

差利拍片，女主角個個如花，十六、七歲卜卜脆，肯定難過美人關。拍片前後，幾乎都成入幕之賓，或成夫婦，離離合合，有賺有蝕，總之就係桃花運。

四十三年前今日，差利以八十八齡仙逝。

西門公子