為小儀獻出幕前第一次

張繼聰揭追女真相

由阮小儀主持的香港開電視訪談節目，首集嘉賓邀來張繼聰。阿聰除出動私伙電單車載小儀遊車河外，還獻出自己“第一次”調酒給小儀，令小儀大叫榮幸。

阮小儀主持的訪談節目《小儀與十三型男》將於本周六啟播，節目組邀得十三位不同類型的型男跟小儀“約會”，首集嘉賓便邀請了“愛妻型”張繼聰擔任約會嘉賓。為博小儀紅顏一笑，阿聰可謂出盡法寶，除出動私伙電單車載小儀遊車河，還獻出幕出第一次調酒，令小儀大叫榮幸。

在節目中，張繼聰自認是一個合格的男友。他說：“每一個男人着緊另一半嘅話，都會想佢開心，會諗一啲驚喜畀對方；當時間長咗，戀情變成感情時，更需要浪漫時刻去保持關係新鮮。”期間小儀問張繼聰覺得自己是哪類型男士？阿聰笑說：“好多人覺得我係搞笑型、肌肉型，其實我覺得自己係文青型、家庭型。”小儀聞言即大派檸檬：“睇唔出你係文青型，但絕對係家庭型！尤其是你有自己家庭後更明顯，所以我會覺得你係愛妻型。”

張繼聰又大爆跟太太初相識的情形，自認是自己先迷上謝安琪，否認了“女追男”的網上傳聞。他說：“雖然我哋係同一間中學，但唔同屆、唔認識，網上流傳佢追我嗰啲係假嘅。真相係我哋同一年嘅新人，佢派歌先過我，我聽到佢嘅歌，覺得正喎！即被呢個女仔把聲同質感所吸引；把聲咁正，通常個樣都唔差。喺電視第一次睇到佢嘅MV，覺得正喎，於是就好主動去追呢個女仔。”被問到當年以甚麼手法追謝安琪？張繼聰表示以傳統的傾電話攻勢：“同佢講電話！記得有次喺電話約佢睇戲，點知佢三日都唔覆我，我於是嬲嬲地問佢點解唔覆我？佢話嗰套戲唔係特別想睇，所以咪唔覆囉，我覺得佢好有性格，令我更加鍾意佢。”

談到謝安琪，張繼聰總是一臉甜絲絲，他指雖然結婚多年，但太太仍會叫他記着初次見面的感覺，而他亦會努力經營保持拍拖的感覺。談到夫妻相處之道，張繼聰說：“太太係最好嘅朋友，因為日日都會對住。我同太太都唔係重物慾嘅人，買禮物係口氹唔到對方開心，反而共度假期比較重要。好似有一年情人節在尖沙咀碼頭攞住支結他Busking唱歌畀太太聽，其實都驚口架，但印象好難忘。”

談到張繼聰的嗜好是玩電單車，他形容車是最好的第三者：“男人玩好多嘢都可以好大件事，不過玩車最緊要安全！最好唔好太揮霍，太太又鍾意坐嘅話，成件事變得好浪漫，所以車係最好嘅第三者。”