重頭賽車已煞科

疫下幸能完賽果

鐵騎少了馬基斯

群雄趁勢爭冠時

一級方程式賽煞科，一如季初所料，平治雙雄咸美頓、保達斯贏總冠亞，韋斯塔班總季軍，平治車隊繼續蟬聯車隊總冠軍。

今屆比賽乏善足陳，受疫情影響，年中才開波，且閉門作賽，氣氛大減，形成賽期緊湊。本來近屆都是平治鬥法拉利，紅牛次之，惟今屆法拉利太弱，賽了兩站便知冇料到，反而紅牛演出穩定，經常位列前三。

不過平治雙雄稍一不慎，便成韋斯塔班世界，連一向中游位置的佩雷斯也奪過冠軍。法拉利卻有心無力，能上頒獎台次數似歷屆最少，令拉利車迷極度失望，反而用平治引擎的其他車隊，成績更理想。

另邊廂MotoGP世界格蘭披治電單車賽，戰果令車迷大跌眼鏡，幾乎中上游車手都有機會奪冠軍，總冠亦令人出乎意料，馬基斯成了其中的關鍵人物。

馬基斯近屆總冠成其囊中物，可惜季初翻車受傷，車迷以為錯過三幾站可復出，孰料整季仍未見影，比賽便成為群雄割據局面。

本以為杜維斯奧素、瓜達拿路、雲拿利斯、莫比迪利甚至身經百戰的羅斯都有機會，但卻標出個米亞，密密上頒獎台，最終奪得總冠軍。今屆MotoGP是最多車手取得分站冠軍的一屆，包括了賓達、奧利華拉，連往屆一直在中游的艾伊斯柏加奴都可兩企凳仔，自然小馬基斯得父親及兄長教路，亦取得不俗成績。

誠然，馬基斯在MotoGP實力超班，有他在，都被眾車手視為假想敵，名次沒有變化那麼大。少了大馬，其他車手便顯得實力接近，你追我趕更好睇。

論刺激，Moto 2及Moto 3不遑多讓，車手多是生牯仔，領先前列車手經常互換位置，未到最後一刻不知鹿死誰手。

但願下季比賽疫情漸散，不再閉門，始終有觀眾的比賽，相信車手會發揮得更好！

羅倫斯