張瑪莉敢別人不敢言

上帝都打救唔到，香港市民今年冇咗普天同慶的聖誕；之後，新年直到農曆春節都可能“冇咗”拜年。幾生修到的奇遇。

“我覺得我哋政府眞係好離地、好離譜。我哋現在唔係第一波，已到第四波啦，試過‘清零’，到底問題出喺邊度呢？”炮轟香港特區政府的那位勇士，來自保良局孤兒院的第二屆香港小姐、李小龍大嫂張瑪莉。她在會所吃早餐，看到份份報紙都鬧政府：“現在不同屋邨都有事，政府話十二月二十二日才做酒店隔離，眞係豈有此理。”

指定檢疫酒店的安排，好多國家已經實行。張瑪莉借他山之石發第一砲——澳門、內地、新西蘭、澳洲，許多地方都做晒啦！我哋的官仲話硏究，仲使硏究？咁多成功例子。

防疫大戰，有人講就天下無敵。張瑪莉第二砲：點解漏網之魚會成群結隊？狠批執政者有心無力：“我識又好、唔識又好，累積確診七百幾人在唱歌跳舞群組裡面，網上相片可見個個唔戴口罩，又超過限聚人數，為何唔檢控佢哋？”張瑪莉認為，執法不應全依賴警察，其他紀律部隊或食環署人員都要幫忙。“檢控有一定作用，應該唔止罰錢。香港人許多不志在錢。現時重點係疫情，關乎人命。”

“我自己覺得，我哋政府眞係好離地、好離譜。”張瑪莉服務社會多年，係十大傑青，說別人不敢說：“我哋政府好驕傲？唔係！不是政府唔啱，係裡面有人好驕傲，成日覺得自己方式好得。”

香港市民好乖！張瑪莉以自己及朋友為例——完全唔約人食飯，希望盡快“清零”，回復正常生活。點知到處漏洞，不少朋友去唔到外地，都已轉上內地，還可以開心過聖誕。反觀留在香港的一群，苦不堪言。“我哋自己搞掂自己囉，今個聖誕同過冬盡量減少聚集啦，望政府嚴厲執緊防疫政策，不要令市民太大失望。”張瑪莉呼籲政府以警誡性質執法；市民不要掉以輕心，緊記戴口罩、勤洗手、小心飲食、用過紙幣及信用卡要清潔消毒才放入銀包。

贈你抗疫良藥：緊張小心，不忘喜樂開朗！

高 梁