發哥與網民有趣互動

“我的偶像是你呀！發哥，你的偶像呢？”周潤發與粉絲玩網上遊戲，任問任答，但求開心。我的偶像嘛？周潤發眈天望地，突然回眸，眼波一拋，“你囉！”一位十二、三歲將熟未熟的青澀女孩子似全身觸電、靈魂從眼睛出竅的大特寫，甚麼叫“神魂顚倒”的樣子，恐怕影后也被考牌，好傻！好可愛！好尷尬！

點解發哥日日去行山？“我冇日日行山，只係一、三、五；至於二、四、六就舉啞鈴健身。”

點解？“我幾十年拍片，好多動作，我不是武師出身，沒有正式訓練。許多時用錯力，關節不少舊患。近年有空閒時間，行山！係調理關節的一種療法；同時要健身，增強肌肉，關節必須有肌肉保護的。”

一題未完，一題又起，發哥行山快抑或發嫂行山快？“發嫂行山快，且快我好多，追佢唔到口架。”粉絲話音未落，周潤發已搶答：“發嫂行山咁快，因為佢借咗大耳窿囉，好多人追債，有時行山破九秒九。”發哥一臉正經：“我有食有住，全靠發嫂，佢好大使費；我用錢好少，冇人追我債，所以慢慢行山囉。”

發嫂欠落周身債？千眞萬確。在另一個專訪《發嫂比發哥更紅》中，只見在九龍城街市，發嫂所到之處，老闆、伙記都親如家人；靚魚、靚菜、靚肉及早準備，發嫂一聲唔該就拿走，不用畀錢。有時請客親友，奶茶咖啡、蛋撻撈麵任食，也不用畀錢。周潤發獨嗜“菠蘿雙油”：牛油塊打孖上。

街坊信任發嫂發哥，菜錢、魚錢每個月巡迴清數一次。還多一次，每年農曆年廿九，夫婦結伴到各店隆重拜訪；“不得欠債過年”，中國人傳統商業美德。夠膽說，九龍城街市不少商號是發嫂的債主，並無追討，希望更欠多些。

大明星、幾十億身家，點解迫巴士、地鐵？刻意親民、塑造平民形象？“我就係平民，南丫島赤腳小孩子，最喜歡簡單舒服——旺角到中環辦事，坐五分鐘地鐵，還是塞在路面個多小時？慳錢又舒服，何樂而不為。”

高 梁