鄭則仕拒約苑瓊丹怕惹閒話

近日苑瓊丹不停為新開設的即食餸包做宣傳，日前便邀來鄭則仕（Kent哥）亮相宣傳片，更大讚好友廚技高超，對食有深入研究：“佢兩公婆都好客氣，有時阿嫂又買蛋糕、又買生果，Kent哥就負責落廚煮飯。佢最拿手整燒雞同蓮藕炆腩仔，講究到邊個街市買邊樣材料。所以佢唔做戲的話，開餐廳一定晚晚爆晒場。”

苑仔知道老友口味，專程帶Kent哥到燒味工場品嘗即燒三層燒腩仔，Ken哥大快朵頤後就話：“佢叫到我就冇法抗拒喇，次次都係出雞脾打人牙骹軟呢招！其實我就鍾意食嘢，煮飯就因為疫情逼出來的。廚藝食得入口啦，算唔上係精品，都係睇食譜學吓學吓咁煮。其實我就好想煮一次畀苑仔食，但係次次同佢食飯都係出街食，又畀佢爭贏埋單。”

Kent哥又話要跟苑仔學做生意：“我做過好多生意，但全部失敗收場！所以唔敢同苑仔夾啦，要跟佢學嘢！呢排疫情少見面，限聚令下更加唔約啦，因為佢帶唔到老公、我帶唔到老婆，你知佢幾風流啦，實被人講閒話，所以今日拍片先敢畀佢餵我食件叉燒咋。”