昨晚賽事總投注三百十二萬

余健雄起孖埋齋

昨晚草沙混合賽完結。是仗只跑五場，戲碼平淡。馬會公佈總投注三百十二萬四千元。

頭場恩利克騎適廄“好友勁”先拔頭籌。此駒上次同程跑第九，敗後原裝配搭再來。今於四班負重磅出戰，起步快人一拍搶前，緊貼前領馬而跑，入直路邁開大步衝過終點，輕鬆勝回一局。“好友勁”今仗不乏捧場客，獨贏一度熱至三倍，幸得廄侶“阿努納奇”搖旗吶喊，充作開路先鋒。“好友勁”跑完獨贏有六倍，分頭不俗。恩利克、王君適齊添頭馬。

第二場劉永康替豪廄“西門吹雪”開齋。此雙人馬上次沙地跑入連贏，表現悅目。今次轉戰草地受人追捧，獨贏不足五倍。劉永康出閘跟住三四位，全程力拼由頭搏到尾，埋門勇挫恩利克“美麗閃耀”，並打破騎者起孖美夢。“西門吹雪”質新勇進，贏馬開竅後料有更進一步表現，下次再來仍堪追捧。

第三場何華麟贏賀廄“超群出眾”。此駒上次由中野省吾執鞭跑第十，輸至脫節。敗後走馬換將再戰，今次交何華麟掛帥。騎者出閘得佔先機，沿途守住頭位，入直路發力衝刺，將對手一網成擒。“超群出眾”今次贏得新季首W，騎練居功。

第四場馮廄新馬“方圓萬里”打響頭炮。此駒由余健雄主轡，出閘快步搶先，全程領放直帶到尾，贏來輕鬆自如，反映沙地性能出色。“方圓萬里”在此間首次披甲即勝，騎者交到功課，練者居功不小。

尾場余健雄贏譚廄“豐收年”，起孖食尾餬。此子贏完“方圓萬里”乘勝追擊，騎“豐收年”出閘以快打慢，全程同對手力拼到尾，最終以較強衝刺掟甩對手，輕鬆取勝。譚廄食尾餬，余健雄起孖寶埋齋。