為保護野生動物開筆

劉心悠冀開畫展

劉心悠獲野生動物保護組織邀請，繪畫一幅野生動物的畫作，希望喚起大家對保護野生動物的關注。心悠表示會繼續執起畫筆繪畫，更唔排除開畫展是她的未來目標。

今年新冠肺炎疫情爆發以來，劉心悠除了工作外，其餘時間基本上乖乖宅家抗疫。藉這段休閒時間，心悠重拾已封筆八年的畫畫興趣。機緣巧合下，她亦再次獲野生動物保護組織發起的“End The Trade”邀請，繪畫了一幅野生動物的畫作，以喚起大家對此事的關注。

短片拍攝當日，心悠把畫作帶到場地，不論拍攝導演還是心悠工作團隊，看到畫作都不禁嘩然。心悠說：“點解大家會有咁大反應？其實我在加拿大讀書時是讀設計的，識畫畫係需要！有同事見到幅畫後疑問係咪我畫？好在畫畫時有朋友幫我拍了片。”

今次心悠的任務是需要繪畫一幅野生動物主題畫，最後她選擇了畫大象。心悠說：“本身收到他們給我參考的圖，係一些後現代派風格，但冇規限。最後我上網做資料搜集的時候，見到一幅Real Life的大象相片，大象BB眼神好無助！我覺得好切合今次主題，所以最後我就畫咗呢幅Real Life的大象BB。”

今次拍攝的宣傳短片中，除了畫畫之外，還有另一個挑戰就是要跟三位小朋友一同拍攝。心悠笑言：“拍攝的最大困難，一向都係遇到動物同小朋友。今次拍攝的小朋友都好得意，算係好聽話。不過當佢哋唔受控制時就需要耐性，還有係佢哋拎住畫筆周圍畫时，我當時好擔心會畫花我幅畫作。如果真係畫花咗，我會傷心，畢竟我都用咗好多時間準備，也畫咗八個鐘。”

完成拍攝後，心悠表示會繼續執起畫筆繪畫，“我會繼續畫畫，但唔會為開畫展而畫。開畫展都一定要有一個目的，舉例可以係為慈善，或者想喚起一些值得大家關注的事情。”問及下一幅畫幾時完成？心悠表示要有靈感才開筆：“或者下一幅畫可能係畫垃圾！其實垃圾可以有好多種解釋，除了一堆垃圾，垃圾都可以形容一啲事情等等。除了畫畫，其實今次執筆後，我工作室畫畫的那個畫架，都係我自己做木工及裝嵌的。之後我想嘗試畫畫的畫框都係由自己製作！”