千嬅避疫宅家狂食脹廿磅

日前楊千嬅作客TVB娛樂新聞台節目《StarTalk》，大談將舉行廿五周年個唱感受。千嬅說：“今次同巡唱完全唔同，係一個全新嘅個唱，用劇場形式表達我呢廿五年，所以要花更多力氣同能量去演出。戰戰兢兢走到依家，有好多健康、安全問題要兼顧，但抱住積極心態，發生咩事都好，會以安全行先，唔得就再惗其他方法，改形式，甚至取消。”

問到今次個唱的準備工夫，千嬅說：“其實演出係需要Keep住練習，因疫情休息咗一年，成個生活習慣都改變咗，就係自己唔慣停咁耐，令到自己不停食嘢，其實我已經唔係為肚餓而食咁多嘢，而係我將平時工作嘅幹勁轉移去食嘢，惗Rundown變咗惗菜譜，我惗我重咗廿磅，有一日發現睡衣都窄窄地就知大鑊，好誇張，照鏡唔對路。初初做返Training，我做引體上升嗰下真係好辛苦，依家進入直路。”