悱惻纒綿茶花女

小仲馬之小，因乃父是大仲馬，故名。大仲馬以《基度山恩仇記》、《三劍俠》傳世，卻極之風流，私生子無數，小仲馬只芸芸其一耳。

小仲馬雖無乃父風流，卻與青樓有緣。其時巴黎有名妓曰瑪麗，本鄉下妹，只因花容月貌，十六歲出道，瞬即成花都交際新星。仲馬仔一見鍾情，見佢明眸皓齒，人高身裁靚，既成入幕之賓，亦兼為情人。

桐油酲始終裝桐油。瑪麗好錦衣華服，珠寶鑽飾，長駐青樓樂此不疲，乃至做到嘔血。仲馬仔勸佢從良，不聽；更發現佢勾了個花靚仔，一怒之下，留書絕交。

未幾，得聞瑪麗操勞過度，咯血而亡，年僅廿三。仲馬仔深感懊悔，以廿四之齡，據此寫成小說《茶花女》，悱惻纒綿，仲馬仔亦因之名留後世。

話劇《茶花女》首演，哄動一時。仲馬仔電告乃父：人皆以為係你作品！老仲馬曰：仔，我最好作品就係你！今日係小仲馬逝世一百二十五周年。

西門公子