賓菲加硬撼青鋒

【本報消息】澳門盃甲組足球賽，今晚九時氹仔運動場獨腳戲上演爭冠關鍵戰，賓菲加硬撼青鋒合演“紅藍大演”。踢少一場跌落次席的賓菲加，今季發揮比青鋒佔優，有力搶分追趕榜首澳科鄒北記。澳科鄒北記昨晚以十五比○炒起葡人之家後，暫搶榜首兼搶得得失球優勢。

賽事原定月初舉行，一度因防疫關係延期至今晚舉行。賓菲加上仗大勝蒙地卡羅，一度將得失球優勢擴大至九球，但隨着澳科鄒北記昨晚大勝，令賓菲加的得失球由領先變落後，今戰鬥青鋒必須大勝六球以上，才能重奪榜首。雖然賓菲加前線哥爾斯、威廉、梁灝然掛帥，李敬斌、域陀支援進攻火力強橫。不過倒戈賓菲加的射手高美斯今季表現雖不及以往，但仍頻有士哥，儘管青鋒人腳比賓菲加稍遜，但亦非善男信女輕易就範，賓菲加要贏波且重新追上鄒北記的得失球，難度十足。

澳鄒摧毀葡之家

甲足昨晚七時上演兩戰，澳科鄒北記鬥葡人之家為追趕得失球，開賽即火力全開，上半場已有迪亞高、艾拉奧祖各自大演帽子戲法，半場領先八球。澳科鄒北記在換邊後繼續攻，何文浩在六十四分鐘同樣上演帽子戲法，林嘉誠七十九分鐘單刀妙射遠柱贏到十二比○。最終澳科鄒北記有迪亞高及艾拉奧祖各自入五球，何文浩上演大四喜，以十五比○摧毀葡人之家，踢多一場及三分領先賓菲加上榜首，且將得失球優勢拉開至六球搶得主導權。

另一戰蒙地卡羅鬥聯樂榜尾大戰，蒙卡在下半場早段踢少人，聯樂靠馬文達在七十分鐘奠勝贏二比一，今季開齋兼首度搶分升上尾二，將蒙地卡羅踢落榜尾。