珍珠鴻運重上征途

馬季開展逾兩個月，練者形勢競爭激烈。現時馮耀正、錢健明及張兆煊同取十W排名前列，未分高下。史偉恩、摩利高、謝偉豪以六W及五W排名四至六位，各人頭馬數字貼近，料季內必有激鬥。今季未開齋騎師艾比及中野省吾各有不同際遇。前者開鑼日騎浩廄“濠爽”本有開齋機會，因後上姍姍來遲，埋門影相輸個嘴，敗於“櫻花路”腳下，飲恨第二。該仗練者有心關照，唯騎者未能把握機會。及後“濠爽”原裝人馬轉戰千八米，臨場落重飛，獨贏熱至得兩倍，最終只跑第三，艾比失諸交臂，再次錯失贏馬機會。馬圈講現實，騎師交不到功課，要搵座騎就難，故此子近期參戰馬不多，縱有亦戥場角色。中野省吾際遇較佳，上季同浩廄拍檔搵到啖食，單一匹“利是寶”已取不俗戰績，騎練合作無間。季初中野省吾停賽多期，復出後連仗未開齋，迄今只取兩亞六季，成績未如理想，情有可原。其實此子騎功唔算差，回顧開鑼賽當日，騎浩廄“珍珠鴻運”後上第二，該仗屈居“愛神之駒”超班馬腳下，雖敗不辱。“珍珠鴻運”蝕分出戰，騎者算交到功課。

澳馬今期只跑一次賽事，周六沙地日馬排位昨已公佈。“珍珠鴻運”今次有份參戰，編在第四場三班跑一五一○米，回配中野省吾熟手操刀，練者擺明要益佢開齋。“珍珠鴻運”連仗用不同騎師均無功而回。拼後小休重上征途，此番雖仍蝕分畀對手，但磅輕可恃。此駒草地起家，沙地亦醒神，今遇同組不穩分子居多，憑騎者戰意，隨時一網打盡。