小肥演網劇拍到想嘔

《紅VAN》原著作家Mr.Pizza的短篇力作、由導演劉翁執導的Hmvod全新網劇《把砒霜留給自己》之單元《水底三十尺》，將於今日上線供網民免費睇。

《水底三十尺》由小肥、灰熊（蘇宸褕）及《全民造星3》參賽者“港版石原里美”鄭嘉欣 (Christine) 等主演。提起拍跳海浸親的戲份，小肥形容難到不得了：“要赤腳拍，海又有浪，嗰日又凍，好多嘢好難控制，拍咗好多次、跳咗好多次海，幾乎拍到嘔。”

戲中小肥常被朋友取笑、欺凌，他笑言現實中身邊的朋友亦同樣口賤，但未去到欺凌他的地步。

飾演小肥女友的Christine，《水底三十尺》是她的處女演出，她覺得背對白最難，坦言拍攝時NG好多，幸好小肥體諒，更安慰及鼓勵她。對於被形容為“港版石原里美”，Christine笑稱感到很開心，因為石原里美係一個好靚的日本紅星。