奇特跑道東望洋

路窄彎多考戰將

炒車大多衝彎位

判斷超車要有計

大賽車開打在即，車友聚會，一講賽車眉飛色舞，懷舊一番。

睇賽車，邊個位置最刺激？大多數人指葡京彎。的確，此彎撞欄最多。從舊稱遊艇彎開始（即現金麗華酒店前），戰車入彎攞位稍偏，可能先撞欄，或反彈路中，炒車即從此處開始。昔日名將羅路就在此撞欄燒焦。幾乎全Circuit唯一大直路，便從此處直趨葡京彎，尾隨戰車多食住前車氣流，隨時在兩邊抽出超車。

不過，若車手判斷錯誤，會入彎撼欄，或直飆出跑道。如連撞欄都冇機會，便像年前德國女車手上演炮彈飛車，直衝攝影台，成為歷屆賽車最經典一幕。今屆多了內地車手來澳角逐，葡京彎必須打醒十二分精神，事關年前此彎略為收窄，更考車手判斷力。

本來加思欄彎在上世紀賽事多告平安，惟近年多了意外，可能車速一年比一年快，三級方程式戰車炒得多，曾現戰車騎戰車險象。

有人話，嶺南彎居高臨下睇戰車蛇形過彎，很刺激，但校方不會讓學生觀戰，認為只要飄下一張白紙，足影響車手視線，造成危險。

劏狗環昔日少撞車，但年前意外增多，戰車炒埋一碟，附近大廈居民睇得最清楚，網上鋪了不少撞車相。至於劏狗環上路彎位，亦發生過若干意外，不過較輕微。至於過髮夾彎返到漁翁彎，同樣有戰車波勾，撞石壆退賽。

數十年前水塘彎有斜埗頭，戰車勁撞沙包後幾乎衝落海。打從填海後再修靚彎道，炒車機會大減。

澳門跑道彎多路窄，無緩衝地帶，上坡落斜考車手技術，撞欄有如心口碎大石，成為最具挑戰性的街道跑道，不少外地車手就喜歡接受挑戰。今屆由大灣區車手角逐，實力接近，料有激鬥！

羅倫斯