騎師張志立暫領先

柏檔明駿飛到馬到

上仗戰果又見亂籠，頗多場次爆到七彩，馬迷唔易買中。近期七駒角逐場合例必反底，冷馬跑出來，公眾熱門“全叮”，馬迷遇上馬少場合不宜熱捧。高君濤重心人物上賽連場倒灶，座騎“體育名將”、“世界精品”及“寶寶”跑至三甲不入，令人意想不到。“體育名將”兩倍熱門出閘搶放，但無頭無尾，敗得含糊。“世界精品”四倍熱唔透，全程包尾。“寶寶”同樣四倍，出閘快放兩段即收工，跑法同前駒如出一轍，似是無心戀戰。

高君濤尾場騎鄒廄“高而靜”施展渾身解數，出閘搶先，全程自造步速，帶入直路發力衝刺，埋門輕取對手三個身位，替馬匹贏得今季漂亮一仗。高君濤喜打時價波，表現令人難以捉摸，今季能否衛冕冠軍言之尚早，日後演出仍反覆無常，未必可“冧莊”。

現騎師龍虎榜上頭號人物張志立，上仗又憑輝廄“柏檔明駿”再添一W，暫以九W續領風騷。“柏檔明駿”臨場票數硬朗，捧成頂頭大熱，獨贏不足兩倍。此質新馬雖具爭勝條件，惟賠率不成正比，但贏來如入無人之境，最終黃袍加身，輝廄憑此駒開齋，騎者居功。張志立近期鋒芒畢露，騎功有進步，陣上留放有一手，加上有五磅可減，只要座騎夠實力交到功課，季內倘保持鬥志，爭冠軍可加入戰團。