遺才後世話老柴

俄羅斯國寶柴可夫斯基，當今唔識五音者恐亦聞其名，未聞其名者當亦嘗聽其音樂，唯不知係佢作耳，《天鵝湖》、《胡桃夾子》總有一段會聽過。今日係佢謝世一百二十七周年。

百年身後，仍有疑團未解。點死？係咪基佬？眾說紛紜，莫衷一是。霍亂染疫？似無實據；抑鬱過度？難圓其說；砒霜自殺？死無對證。然無論點死，沙皇皆以國葬厚待之，皆因佢係天才加偉大。

然基佬之爭，於今猶烈。史家證據確鑿，話佢基硬；衛道者則指冇件咁事，皆因搞基有壞國體。當今總統普公認為無所謂，係又如何？為此普公幾乎被釘十字架，乃至要簽發禁基令，卻又被國際愛基人士抵制。

天才國寶人生失意，卻遺才後世，聽佢音樂，斷估唔會係咁。上帝好公平，閂咗扇門，打開道窗。然冥冥中似有主宰，名作《悲愴》首演六天，老柴即撒手塵寰。佢自悲愴，世人亦悲愴，天意乎？

西門公子