好了傷疤忘了痛

趙慧珊街頭撩狗玩

早前推出新歌的趙慧珊密密搵銀，日前冒着黃色暴雨在街頭拍廣告，爭分奪秒拎正牌周街跑。拍攝期間遇上西施狗路過，她竟忘記早前被狗咬傷嘴唇的創傷，開心撩狗玩。

剛推出新歌的趙慧珊(Aka)，近日為某手錶品牌拍攝一輯全新廣告。雖然拍攝當日遇上天氣不穩定，更一度發出黃色暴雨警告，但最後仍順利完成拍攝。Aka直言非常感恩︰“我覺得好幸運，天氣唔好成日都落大雨，下午仲要黃色暴雨警告。我們大部分時間都在室外拍攝，但好神奇的是，當我們要到街上拍攝時就會停雨。”

Aka於廣告中換上四個不同的造型，還要穿上運動裝於街頭斜路跑上跑落，不過Aka不覺辛苦，還直言爽到爆︰“平時都有跑步，所以唔覺得辛苦。反而因為疫情下跑少咗，現在可以拎正牌在街上跑步，感覺好正！其實呢款錶主題好適合我，係講永不放棄！好似做運動咁，只做一兩日係冇用，要一路Keep住做、唔好放棄。”

為了今次的拍攝，Aka之前要戒食最愛的雪糕乳酪，以保持弗爆身形。而且拍攝當日更特地提早起身做運動，希望身形變得更弗。Aka笑言拍攝完就會約朋友食雪糕及大餐，又稱拍這個廣告非常開心︰“小學時已經買呢個牌子的手錶，入行後就經常戴住去做運動，現在搵我拍廣告好開心。而且新款錶可以測心跳及卡路里，對我來說好有用。”

在街上等候拍攝期間，Aka遇到一隻西施狗，雖然主人示意狗仔離開，但西施狗卻向住Aka搖尾，哄得她非常開心。早前曾被狗咬傷嘴唇的Aka還蹲下與西施狗玩耍，嚇到經理人及工作人員非常緊張，急忙叫她起身。Aka表示︰“西施狗好開心咁向我衝過來，我發覺原來我都幾受狗仔歡迎，唔記得咗之前發生過意外，仲蹲下同狗仔玩，之後仲吸引了大狼狗過來。經理人就好緊張地叫我起身，現場工作人員都好擔心。當下都有啲驚，係要時間慢慢去克服的。”