八年驗車好快過

汽車毛病不太多

普通舊車唔值錢

遇上好運執番件

近年城市生活節奏快，實施八年驗車，很多車主都在不知不覺間首次驗車。

小城地方細，有些家庭汽車使用率低，甚至是假期車，擺多過揸。昔日傳統汽車落足料，頗襟熬，超過十年仍老當益壯，特別是日本汽車，確比水土不服的歐洲車耐用得多。現時仍有不少十五六年的舊日本車在市面行駛，只是較食油。

十多年來，汽車設備日新月異，大多注入高科技元素，電腦檢測，先進得來反而有毛病。一來有些車主欠保養，或無完全摸清功能及性能，導致易壞車；有車廠則經營有術，某些設備三兩年損耗要更換，不像以前用料做足咁“老襯”。

別以為用車少就會襟用，汽車機械就像人們鍛鍊身體，同樣要每日操作，間中開快始會行順。行咪數少，只能讓座駕身光頸靚，對機器保養無大幫助。

講到驗車，有些人怕麻煩，經濟好者，寧趁驗車前賣掉換新車，故而不乏二手車市場。最近朋友買了架幾手車，用個多星期毛病出現，頭都大埋。

買舊車，講經驗，最好與識車之人幫手睇車，睇真有無撞過；其次要試車，可感覺機件是否正常運作。至於內飾，企理便OK，有時或執到筍貨。

從來新車落地即唔見錢，舊車更不濟。普通牌子逾十年車，頂多值一萬或幾千，殘舊車更唔值錢，劏之哉。除非係保值車，即經典類型，幾舊都有人買心頭好；或多人渴求的舊版，即再出產亦新不如舊的，稍放低價搶住要。

舊車放車行，必然會壓價，做生意梗要有得賺。車行執一執，起死回生，又可賣到好價錢。有些車主喜在FB放車，有圖有價，反而多人問津或成交。通訊發達，無疑令二手車行生意稍受影響。不過，有專門售賣二手車的店舖，則不受影響。

羅倫斯