四劇連播反應好

高海寧唔敢諗攞獎

高海寧、黎諾懿、簡淑兒、林漪娸及楊卓娜昨日出席新劇宣傳記招，眾人現場分組玩遊戲，又頭碰頭面貼面，玩得十分投入。

高海寧（高Ling）近期一連有四套劇推出，劇集《C9特工》將於本周五播大結局，可會感到失落？她說：“一次播出四套劇係開心的，因為之前宣傳好密，之後可以抖吓。依家剩返一套《七公主》未出街，觀眾可能要等多一段時間才可以在熒光幕再見到我，希望拍返多啲存貨。”

高Ling表示早前做過街頭訪問，問觀眾對她連續有四套劇播出的意見。她開心透露觀眾普遍答好：“仲收到好多鼓勵，話睇到我有進步，觀眾都明白有幾多套劇推出唔到我控制。（哪套劇最受歡迎？）依家咁睇係好多人睇《C9特工》，連小朋友都好鍾意。”對於有指她一連幾套劇播出，其實是TVB為她奪視后鋪路？高Ling說：“唔敢諗！拎獎要天時地利人和，我只係做好本份，其他事控制唔到。”

黎諾懿笑指觀眾可能要等一年後才可以再在熒幕上見到高Ling，不過她這段時間可以先返內地拍劇。他又稱自己今年只得返一套劇《刑偵日記》未播出：“我都想多拍劇集，不過今年除了拍劇外，亦要拍綜藝節目。除咗拍《疫境廚神》，之後仲要拍兩個綜藝節目。每個節目都要諗幾個菜，淨係諗煮咩都諗到頭痛。”諾懿笑言自己有劇集推出，又做主持，希望可以得獎：“希望可以一次過拎視帝、最佳主持及最佳節目三個獎，到時我就可以息影喇！今年好大機會，如果唔係，即係公司仲要我，（我）仲有利用價值。”

簡淑兒透露近日同時忙於拍攝《智能愛(AI)人》和《我家無難事》，所以無時間追看《C9特工》。她表示今年已拍了四套劇，疫情下有這個工作量已好感恩。

對於有傳她與男友已復合，但她忙於拍劇，豈不是冇時間拍拖？簡淑兒大方承認與男友復合，但會以工作為重心：“男友都好忙，我哋依家已經唔係以前熱戀期，一齊分開都試過，大家好清楚了解對方習慣同底線。（可以直接結婚？）今次再一齊反而冇諗，之前屋企人都有畀壓力，依家我哋會隨住感覺走。”