世界精品來者不善

馬季開鑼跑過三仗，練馬師尚有多人未贏馬，外籍馬房賀蘭杜夫、李森仍未開齋。前者上季初三個月內連勝十多場頭馬，氣勢一時無兩。由於馬匹搏得多，今季多要等回氣再用，故季初無建樹唔奇，料過多三幾次賽事才見攻勢。另一外籍馬房史偉恩廄季初憑“追鷹”打開勝門，練者早着先鞭。贏馬穩定軍心，日後搏殺更得心應手。史偉恩上季摘取十四W排名十二位。練者開倉初期養馬不足十匹，獲得十四W成績算好。高馬分“耀昌之星”十戰取四冠六亞，未甩過Q，演出準繩度高。上季爭打吡埋門輸點數，屈居“聖靈之都”蹄下，無話可說。但史偉恩訓練“耀昌之星”由五班贏至上一班，跑短途增至長途，可見練馬是有心得。此駒已屬鎮倉寶，續可替馬房爭功。史偉恩今季養馬量增，倉口現有十七駒，實力比上季強盛，部分質新馬成熟進步可派用場。多匹舊馬上季贏完已回氣，等待時機再搏殺，預期今季成績更上一層樓。

周六賽期將至，今次上演六場沙地日賽。恩廄今仗派多駒應戰。第三場三、四班一五一○米，旗下“世界精品”復配高君濤操刀來者不善。此雙老搭檔上季取兩捷，人馬表現合拍。唞暑後重新操磨再來，今番復跑沙地開齋路不同估計。此駒中長途馬前後兼具，夥拍高君濤最夾檔，今番人馬重逢可博開齋。