范振鋒因應疫情推遲造人

藝人范振鋒（阿范）日前接受香港開電視主播馬梓軒的專訪，分享離巢後的心情：“我於八月底離開，事前舊公司有同我傾續約，當時我問有咩工作可以延續落去？但佢話暫時冇，所以決定離開！自己冇唔開心，因為我唔係全職做一份工，所以唔會令我擔心疫情下冇主要收入，又或者怕影響生計。”

阿范早前宣佈離開效力多年的電視台，雖然身兼多職，有電台DJ、電影監製等工作，但阿范坦言疫情下收入大減：“疫情開始至今，少咗七位數字收入吧。好彩我同老婆都好慳，平時都係睇戲食飯，依家連旅行都去唔到，出街食飯亦少咗。所以我已經好識用網上外賣平台，一睇就知邊間最抵食！不過都感恩電台、娛樂公司可以繼續有份人工畀到我。”

疫情下會否影響造人大計？阿范笑說：“以前就覺得順其自然，依家就冇咁自然。因為除咗擔心疫情，亦覺得世界好似好恐怖同混亂。另外就係實際問題，原來疫情真係可以令人冇工開、零收入！我可以慢慢捱，但如果生咗小朋友，佢可能仲辛苦仲慘，所以都令我同太太有啲卻步。”