百花鴨

我哋中國人烹雞烹鴨嘅方式多種多樣，老周我就特別鍾意食鴨嘅菜式。以前喺酒樓好興食鴨，唔同煮法都可以搵到，八寶鴨、芋茸香酥鴨等等，但而家真係買少見少，百花鴨呢啲手工菜更係幾乎消聲匿跡，想食唯有自己動手做。

雖然話就話係手工菜，但做法都唔係想像中咁複雜嘅。大家不妨試吓整，一齊回味一下往時嘅滋味。

材料有：燒鴨半隻、蝦肉半磅、核桃肉一両、鹽半茶匙及生粉一湯匙。

做法：燒鴨去骨備用，但唔好切件；蝦剝殼，挑走蝦腸，拍成蝦膠後加鹽調味。將燒鴨皮朝下，鴨肉拍上生粉後鋪上蝦膠，再喺蝦膠面頭鋪上核桃肉，組合好就可以落油鑊炸，用中火炸至金黃色即可撈上嚟，用廚房紙巾印走表面多餘嘅油份，即可切件上碟。

新鮮炸起嘅百花鴨件，外皮酥脆，內裡肉質則仍保持多汁，彈牙嘅蝦滑同脆口嘅核桃肉令口感更加豐富，相信呢道菜將會得到各位同親朋好友嘅愛戴。

周 中

（澳門美高梅金殿堂烹飪顧問）