周慧敏與伍仲衡相識中學時

J2音樂訪談節目《我們的音樂時代》最後一集，主持人許文軒邀得周慧敏(Vivian)及音樂人伍仲衡(Harry)擔任壓軸嘉賓。兩人大談由相識到合作無間的關係，伍仲衡說：“早在中學時期已為她鋼琴伴奏《天荒愛未老》，可惜當時未有合照。上天對我不薄，畀我識到Vivian。”

談到二人多年來默契十足，周慧敏說：“我同Harry比較夾，準則都好相近，所以大家唔使拗。直到一一年開演唱會，我哋才第一次合作，佢寫了一首《無雙譜》畀我。其實我對旋律好奄尖，但聽到Demo已經好鍾意，好感動。到佢再寫《咖啡在等一個人》畀我，我亦一聽就滴眼淚。”伍仲衡說：“畀Vivian聽Demo，佢冇感覺的話係唔會覆我的，即刻覆我的Demo即係好鍾意，《無雙譜》送到佢手上唔夠兩分鐘，即刻回覆我Email。”

周慧敏說：“我在二〇〇六年已認識Harry，當時我好多年冇做騷，諗住要有隻新歌，不過一定要最鍾意、最合心水才會錄。當時Harry的確寫咗首歌畀我，經過一輪考慮，到我話畀佢知我要首歌時，呢首歌已經賣咗，就係楊千嬅的《原來過得很快樂》。既然遇唔到一首自己好鍾意的歌就不如唔出，所以那次就冇新歌做騷。”