離婚新聞牽連四人

兩人離婚，殃及四人——林曉峰與康子妮離婚，傳媒圍訪歌星黃翊，因有指他是第三者；最悽涼苦惱的，卻是他久病纏身的另一半陳存正……

黃翊再三否認是第三者，兩年前，邀康子妮任演唱會和音，慶功後再沒有聯絡。“傳聞一出，我都搲緊頭，（擔心太太睇新聞會傷心？）屋企嗰件身體唔好，作為女人點都有點不舒服，（要跪玻璃？）籐條啫，講笑。（覺得自己無辜？）係摸不着頭腦……”

這宗飛來小三事件，如何處理？陳存正回應：“交畀老公，黃翊有自己人生，佢自己承擔一切後果！（會否加速黃翊給你一個名份，因你們從未註冊？）冇！我一直認為一紙婚書不代表甚麼。結婚都會離婚，離婚要辦許多手續。”陳存正病息奄奄，卻要直面傳媒步步進逼，“結婚嘅嘢唔會諗，係唔需要，大家對感情認眞就得。唔好話忍受，說忍受就好辛苦，我會叫呢啲係消化，咁會開心好多。”至於十四歲兒子對此事會很不開心……陳存正表示：“個仔反而安慰我，叫我唔好諗咁多嘢。佢話，唔開心會食唔到同瞓唔到。”

別人離婚，無端端飛來煩惱的陳存正，坦言患病多年，早已看透一切，不想多理老公的緋聞傳言。“夫妻去到某一個階段，會由愛人變家人。大家感情好好咩？我唔想講大話。好多嘢我都唔得閒理，最緊要唔好搞到頭家。”說到病情，陳存正無奈表示，仍不是太好，“換咗腎仲係好差，一個禮拜要洗腎三次，所以我要開心，否則會影響病情。我跟黃翊一齊咁耐，對其他人來講，已經係三個七年之癢。我會選擇遷就，包容同接納。以前，我哋成日嗌交，對我自己、老公、個仔和健康都唔好。我本來脾氣好大，同黃翊一齊之後就冇晒脾氣，我哋相處嘅方式，就係唔好理論；理論就嗌交。要等對方諗通，我哋相處的確好咗！”

林曉峰與康子妮離婚，一句風言，到底令黃翊跟陳存正這對患難鴛侶關係破裂呢？還是恩愛更勝從前呢？

高 梁