何珮瑜大讚胡杏兒好人

胡杏兒、何珮瑜、沈卓盈、陸詩韻、曾樂彤、吳千語、陳逸寧等日前齊集，為ViuTV新劇《熟女強人》開工，眾女一起講不停，令現場氣氛熱鬧之餘又嘈吵。雖然是首日拍攝群戲，但眾人非常合拍，當導演宣佈收工時，眾女跳舞慶祝，被杏兒取笑場面似足煞科：“都唔知咩事，好似煞科咁，但呢日拍得好開心，因為之前拍屋企戲份就溫馨啲，呢度就熱鬧啲，佢哋可以早收啲。我同陳逸寧就要留低拍多啲啲，睇吓邊個有義氣會留低陪我。”

沈卓盈話現實中都會為姊妹出頭，同眾演員一見如故，瞬間成為好朋友：“其實我哋之前見過一次咋，但嚟到都傾到收唔到聲，其實最想遲下見埋家麗姐，咁就可以齊人玩到癲！”何珮瑜同曾樂彤拍攝打小三戲份異常興奮，曾樂彤揚言會義不容辭為朋友出頭：“得我自己會細膽好多，街邊有人捉住我Sell嘢，我都會硬晒，但係試過有朋友比人非禮，我反而好大膽出聲喝止。”何珮瑜就話杏兒好Sweet，即使首次合作都將大家溶化。