林家謙作歌整蠱王灝兒

林家謙及JW王灝兒為J2音樂訪談節目任嘉賓，談及由家謙作曲、JW主唱的《矛盾一生》成為兩人最廣泛播放的歌曲。家謙笑說：“當時諗，如果呢首歌可以賣畀天王天后梗係好啦！”JW即時起哄說：“你使唔使Google吓我係邊個？”家謙說：“最後這首歌跑出，但三部曲頭兩首都係一早作好之後賣畀佢，但最後一首《自由飛翔》係度身訂做，專登陰JW。”JW說：“首歌真係好難唱，半度半度轉Key，真係錄咗好耐。”

林家謙亦透露了他與台灣歌手林宥嘉的關係：“寫歌畀林宥嘉，因為佢係我偶像。我在社交平台Send Demo畀佢，好似見工Send CV咁，唔會諗住間間都覆我。但佢真係覆我！好記得當時我在灣仔食緊一碗麻辣米線，收到佢回覆Message當下想噴晒出來。”

談及林宥嘉第一首廣東歌亦屬家謙手筆，他說：“歌名叫《壞與更壞》，推出前幾日我才知道係廣東歌。寫的時候諗住有兩個對象，一個係林宥嘉，另外一個係陳奕迅。因為兩個人把聲有個共通點，就係有一種好自然、直接由心唱出來的感覺。我就用呢個聲線方向去寫。最後首歌林宥嘉唱，而其中一位監製係陳奕迅，實在好驚喜、好夢幻，因為兩個對象都在同一首歌中出現。”