樂隊Pandora分享出歌內情

樂隊Pandora日前接受J2音樂訪談節目專訪，MR.成員兼Pandora經理人的MJ亦有現身節目，MJ說：“望住佢哋，好多時見到以前的自己。佢哋會有些無謂的執着，見到佢哋咁執着，我就會笑。其實佢哋夾Band同做人都有好多地方可以進步，我自己都玩咗十年，犯過好多錯，所以我都有好多寶貴意見畀佢哋、客觀地監管住佢哋。”

樂隊Pandora成立十年，不過多年來成員和人數不斷改變，令樂隊發展有所影響。對於成員廷肇於一四年因創業離隊、去年再次加入樂隊，主音Tony未有介懷。Tony說：“廷肇唔止係我Band友，佢仲係我朋友。朋友需要去搵食，你係唔會阻止，而且我的立場應該係關心朋友多過隊Band。當時得返我同細佬兩個，我就想不如叫細佬先去讀書啦。直至一七年，突然諗到夾Band咁耐都冇出過歌，不如創作一首歌，就當係樂隊最後一首歌吧。就寫了《捉緊心跳》，呢首歌係想帶出繼續堅持落去，就覺得都唔一定係結束，其實可以係再開始。所以呢首歌就變成我哋第一首派台歌，呢首歌對我哋有好大意義。”