石詠莉膺微電影影后

鄧健泓鴛鴦浴賀雙喜臨門

鄧健泓(Patrick)首次執導、由太太石詠莉(Sukie)來親身出任女主角的微電影《Dreams come true》，繼今年六月於洛杉磯電影獎(LAFA)奪短片組最佳新導演獎，前日再傳喜訊，在第七屆創+作微電影支援計劃的專業組別奪得最佳微電影製作大獎銅獎，Sukie摘最佳微電影女主角金獎，成為微電影影后。

是次頒獎禮因為疫情關係，由本來三月舉行延至昨天網上公佈得獎名單。說到等候消息的日子有一些漫長，Patrick 說：“現場等揭曉賽果需要一定演技，用力掩蓋自己緊張表情、努力抑壓興奮或者失望，繼續演繹微笑大方。但在屋企就唔使咁多負擔，哈哈！得到兩個獎好開心，特別係Sukie拎到女演員金獎。上年佢有參加第六屆，拎到最佳女主角初級組金獎，今次攞埋專業組金獎，係有實力的證明，我都好撐佢；攞到微電影製作大獎銅獎，我都開心，好多謝一班團隊。”

Patrick諗起Sukie獲獎一刻的反應，不禁笑說：“人哋成日話開心到跳起或者開心到飛起，Sukie等緊賽果時，第三名、第二名唔係佢，佢就有啲緊張，原本佢係坐在檯前，到知道自己得金獎時，佢好大聲嗌出來，然後跳到好高、不停跳咗三四下。我當然要配合佢企起身，佢就捉住我隻手，好似小朋友得獎咁，上下五層樓都應該聽到尖叫聲同歡呼聲。”

Patrick之前親力親為太太製作唱片，屢次取得佳績，回想這幾年種種經歷，他都有點百感交集：“以往睇住Sukie在 IFPI創造奇績，用自己雙手在冇人幫忙情況下，她的唱片攞到銷量獎，今日又在佢身邊見證佢攞個女演員獎。好難形容呢種靠自己努力換取認同，好值得記住呢個咁有意思的時刻。希望我哋的努力，可以換到更加多工作機會。”被問到會如何慶祝？Patrick 笑謂：“我哋的慶祝方法係浸浴。”

成為微電影影后的Sukie，直言獲獎令她感到受寵若驚：“我要多謝鄧導演，佢功不可沒！佢導戲導得好，我才拎到呢個獎。多謝台前幕後每一位人員，佢哋用咗好大努力去做每一件事。”

被指得獎開心到跳起，Sukie笑說：“呢次網上舉行的頒獎禮新鮮感好大，收到消息的時候，我係開心到彈起同尖叫，重點係我冇諗過自己可以彈到咁高！哈哈！呢次在屋企着住睡衣、唔化妝等消息公佈都係好大體會，可以盡情嗌，將自己的興奮表露無遺，呢樣係前所未有的開心。好多謝每位喜歡呢部微電影的朋友，希望未來有更多電影作品畀大家睇到，亦希望自己有多些機會做演員，原來演戲真係好好玩。”