聖靈之都鶴立雞群

馬季開到荼薇，周日上演本季煞科戲，跑後即歇暑。下季幾時開鑼未見馬會公佈。有消息稱，新季可能在九月十九日開鑼，是否屬實，仍待會方正式公佈。

周日編跑黃昏馬，全日六場出馬踴躍，近半場合出足十四匹爆棚。馬多形勢混亂，賽果爆冷可料。重頭戲“澳門金盃”及“澳門短途精英盃”，兩項錦標由高分馬逐鹿，皆有瞄頭。尤其第四場公開賽千八米“澳門金盃”，擂台躉劉志森廄鎮倉寶“聖靈之都”出場衛冕，更令馬迷關注。此馬王上屆“澳門金盃”以輕鬆姿態，撃敗老對手“珍珠勁旺”。今屆兩駒狹路相逢，再次同埸角逐，個人認為“聖靈之都”有力冧莊。此駒在本地跑過十三場共取八冠兩亞，論戰績輝煌。馬匹長期負重磅作戰亦甚少甩拖，若平磅賽更未輸過，演出水準穩定，不愧是本地馬王。練者劉志森對此駒打理及保養有一套辦法，平時普通一班賽事要孭頂磅就少報賽，以免消耗馬匹體力，留待大型盃賽平磅參战可一擊即中。

今屆“澳門金盃”十三駒出爭，場面墟冚。惟各駒實力參差。不少馬蝕分太多，難有抗衡之力，故形勢側埋一邊。掛頭牌的“聖靈之都”實力明顯突出，加上平磅作賽猶如鶴立雞群，唯一對手乃宿敵“珍珠勁旺”。但此駒上届“澳門金盃”都要俯首稱臣，今屆要反勝不易。倘交出水準闖入連贏唔奇。賽日可投以兩駒翻版一Q。