昨日賽事總投注逾三百六十萬

六騎練平分六頭馬

昨天沙草地黃昏馬完結。是仗“澳門評馬同業協進會盃”賽日，入場馬迷比平時多，場面熱鬧。六場賽事總投注三百六十四萬三千元。

頭埸在沙地角逐。李森廄“逹利年”由恩利克主轡先拔頭籌。此雙人馬上次跑同程入連贏，未竟全功。今次原裝配搭捲土重來，騎者謹慎從事，出閘跟貼對手，入直路發力衝剌，埋門將對手一網成擒，替馬匹勝出久違的頭馬。李森、恩利克攜手添頭馬。

第二場高君濤喜捧“評馬會盃”。此子騎摩利高廄“浩勝奔馳”，以輕鬆姿態掄元。此駒上次高君濤贏馬開齋，今次原裝人馬出爭盃賽。臨場被捧成頂頭大熱。騎者出閘快步搶先，全程奮力拼搏，入直路發力悉先衝過終點，大熱門贏來不負眾望。“浩勝奔馳”連下兩城，愈戰愈勇。今次捧走“評馬會盃”，騎、練居功，賽後接受頒奬喜氣洋洋。高君濤打叠贏兩屆“評馬會盃”，成一時佳話。

第三場張志立爆冷贏錢廄“大魔王”。此駒上次千八米無功而回，敗後縮程再戰。今次跑沙地人馬表現又不同，出閘跟貼群駒，末段發力甩開對手直趨終點，爆出十九倍冷W，替錢廄增添進帳。

第四場劉永康爆大冷。此子騎浩廄“創投精英”以較佳留放後上挫敵。此駒上次沙地只得三甲未能出頭。今次移師草地再戰，換上劉永康發揮不同，出閘跟住第三，直路發力衝剌擊敗對手，爆二十四倍冷W。替梁國浩馬房建一功。

第五場陳卓鋒爆冷贏譚廄“壓鑄合金”。此駒上次由余健雄跑沙地短途得第三，拼後走馬換將再來。今次跑草地表現截然不同，一條直路殺低對手，爆十五倍冷W，騎、練齊齊添頭馬。

尾場何華麟開餬。此子前幾場座騎無一勝出，跑至尾場騎輝廄“妙算威龍”險勝對手。此雙人馬上次贏完再來，今次騎者仍發揮水準，替馬房增添進帳。何華麟、李家輝攜手食尾餬。