八月重啟自由行

各行各業迎大軍

口岸入境把好關

做足防疫勿嫌煩

自由行將陸續恢復簽註，除中高風險地區外，基本上九月下旬全國重啟，澳門將迎來久違的內地旅客。

大半年來，受疫情影響，經濟插水，除少數行業如超市生意興隆外，大部分行業都受重挫。與遊客相關的行業，幾乎全線死火，要吃穀種。龍頭產業首當其衝，只靠本地客及零星的無返內地人士博彩，賭收月月插水。賭場員工每月都放些無薪假，收入大減，唔炒已好彩，相信不少家庭都有成員出現此情況。一些與博彩相關行業，直接解職補償，或斗零都冇，員工即告失業。

的士行業慘過吊鹽水，日間還有本地客，夜間生意全無，往日酒吧、卡拉OK場所，的士路過都避之則吉，生怕酒鬼乘坐嘔到一車都係，甚或有人打鬥傷及無辜。現時只要有客，四五架車都泊在門口輪候。就算車主減車租，都係入不敷支。有車主稱連月損失十多廿萬，無人租車。有的士大佬半年來銷聲匿跡，原來已轉行。

應屆畢業生“食正”霉氣，搵工艱難，皆因大部分行業元氣大傷，就算需人手，也不會畀好人工，畢業即失業，時運不濟。有些家境較好者，唯有繼續修讀學位，免誤時光。

新屆政府上場即受大考驗，幸好應對得法，推出多波解困措施，穩經濟保就業，交足功課。搞了大半年，才開始入正軌，爾後有排忙矣。

此番自由行陸續恢復，活水湧至。不過，近日深圳爆疫，情況未明。澳門目前仍要做好防疫，口岸查驗須把好首關，賭場及發財車更要加倍消毒，規定賭客戴口罩。作為市民，切勿群聚，繼續戴好口罩，做足防禦。只要官民盡責，無懼疫病重臨！

羅倫斯