薛家燕扮味公主賣月餅

中秋節將到，薛家燕今年與拍檔聯手推出“家燕媽媽流心奶黃月餅”，更以電影《食神》的“味公主”造型拍攝月餅廣告。為了重現“味公主”的經典造型，家燕姐除訂製服飾，連眼鏡都跟足：“呢副眼鏡，唔係星爺《食神》黑色嗰副，而係我個仔同我訂造嘅，要做番《食神》嘅‘味公主’個樣，但金色嗰副搵唔到，淨係搵到副紅色，我要影相襯番呢套衫，點算呢？好在我個菲傭姐姐噚晚幫我用金色指甲油油上去，所以呢副係用人手手工油嘅《食神》眼鏡獨一無二，好有型。”

家燕姐話：“味公主呢個造型好突出，而中秋節係個大節日，不如請名餅嘅師傅出啲優質嘅月餅，價錢要優惠，等大家過一個愉快嘅中秋節，（點解唔出傳統月餅？）我覺得傳統月餅大咗啲，同埋依家個個都着重健康，家燕媽媽好多家庭嘅觀眾，大人同小朋友都鍾意食。”