蜜汁薑芽鴨

呢排日日都烈日當空，由朝到晚一樣咁熱，搞到一家大細胃口都唔多好，一眾家庭主婦又要各出奇謀。開胃嘅食物不外乎都係酸酸甜甜，今期老周我就同大家分享一道家常菜“蜜汁薑芽鴨”，不但夠晒開胃，送飯亦一流。

我呢道菜特別用到薑芽，亦即子薑，佢細嫩少根，口感清爽，辛辣味比老薑輕得多，十分適合夏天食用，加上宜家難得仲趕得上子薑當造季嘅尾聲，當然要好好利用。

我哋廣東人平時薑芽煮雞就聽得多，其實用鴨肉都相當唔錯。材料有：光鴨半隻，嫩薑芽四両、紅椒一隻、蜜糖兩湯匙、鹽半茶匙、話梅酸梅各三粒、磨豉醬一湯匙、生粉一湯匙、上湯一碗，同埋薑、葱、蒜各少許。

做法：先將鴨切件，洗淨備用；薑芽去皮後切細件，用清水滾三十分鐘，袪走啲辣味。落油燒熱隻鑊後，將鴨件落鑊炒香，加入所有調味料爆炒，之後加入上湯，慢火煮約十五分鐘，最後用生粉打個芡，就可上碟啦。

周 中

（澳門美高梅金殿堂烹飪顧問）