槍法超群 強配出擊

今晚六場草沙混戰形勢緊湊。不少馬季內征戰頻密，搏得多表現易走樣，揀馬投注不宜偏重大熱門。練者梁國浩一向識得部署，旗下馬匹輸完視作減分，待回氣後隨時可翻生。今晚浩廄屯重兵出擊，睇環境會開殺戒。

梁國浩季內暫取二十一W排名第九，以今季養馬十八匹倉口而言，平均每匹贏一場，成績算不差。浩廄戰駒季中求減分，季尾時全力出擊，爭取成績。今仗六駒上陣，匹匹具實力，拚盡有權起孖，值得吼緊。

第一場：五六班千二米。“槍法超群”對前五仗贏後退藏於密。至今連敗多場，評分稍減，現居此組形勢有利。馬匹沙草均佳，尤其跑千二米更醒神。此駒同高君濤夠夾檔，人馬合作有績可稽。今次唞夠出擊，復配騎者出擊駕輕就熟，可勝回一仗。

第三場：五六班千二米。“加洲之寶”連季未贏過，評分減至最低，現居此組應佔便宜。此駒跑千二米最佳出路，同任布利亦屬老搭檔。拚後小休重臨，回配騎者出戰人馬合拍。今遇同組對手寥寥無幾，憑班底支持，可替此駒爭取贏馬。

第四場：三四班千二米。“果然”自馬雅贏後已久無頭馬見面，連敗多場已減分。上次用牌仔闖入冷腳，走勢表現予人好感。此駒質新具潛力，能跟能鬥，有前有後。拚後小休再臨，狀態有進無退。今仗用恩利克操刀擺明要搏，騎者近期鬥志好，冀替“果然”贏馬。