炒腰花

以前豬雜特別受草根市民喜愛，因為豬肉價格不嬲都貴，富貴人家先食得起。咁啱呢排啲豬肉又貴咗好多，老周我成日同啲朋友講笑，話我哋又回復以前買唔起豬肉嘅生活，係時候改返口味食豬雜。

其實好多人都同我一樣，都仲係好中意食豬雜嘅懷舊菜式，雖然唔係乜嘢山珍海味，但好似總有一種情意結。老周我最中意嘅必然係冶味嘅炒腰花，送飯一流，都係唔少人嘅家常便飯。今期就同大家分享我平常炒腰花嘅簡易做法，一齊回味吓兒時味道。

材料：豬腰兩隻、青紅椒二両、葱蒜薑少許、豆豉茸半湯匙、酒一湯匙、胡椒粉少許、老抽少許、沙糖半茶匙、生粉一湯匙。做法：買返嚟嘅腰子要啤水，開邊切件，內裡筋膜在腰背幾刀，再橫切成花，然後用薑汁酒醃一下；青紅椒切角形備用。炒之前，記得先用布吸乾腰花水份。起油鑊炒香豉汁同其他調味料，落豬腰快炒，灒油後打個芡，即可上碟。

周 中

（澳門美高梅金殿堂烹飪顧問）