太極重組年底開騷

雷有輝被隊友賣豬仔

太極樂隊早前佈重出樂壇，年底在香港開騷。一眾成員早前合體翻唱《留住我吧》並拍成MV，為今年演唱會打響頭炮。

主音雷有輝透露太極將十二月舉行大型個唱，他的演唱會亦是由年底的個唱演變出來：“冇十二月太極騷，就冇八月我個人音樂會。佢哋想我打頭陣，先同歌迷熱身。”

日前眾人齊聚錄音室，重新演繹《留住我吧》並拍攝成MV。結他手德哥透露曲風配搭會更有型，希望為港人打氣：“因為疫情，大家呢半年都好困擾，所以今次曲風會比較多爵士樂，感覺會較輕快。而且我哋呢班中佬開始年紀大，唱Jazz感覺會型啲。”雷有輝就玩踢爆說：“頭先Joey訪問時，話叫人留錢買十二月個騷的門票。呢個兄弟衰到呢！所以八月的個唱，我會拉埋佢落水，做我演唱會音樂總監，費事佢甩嘴講嘢！”

Gary Tong則笑言太極欠缺樂隊Band Leader一職，提議即場投票，未料到他被隊友一致推薦當選：“我其實都唔知會發生咩事，淨係知道今日要拍MV。但聽講年尾有個大搞作，冇咩所謂啦，大家埋位就會搞得成的啦！話時話，我哋都成五年冇一齊拍MV，今次難得聚頭，搞到現場好嘈，因為成班人都鍾意講嘢，但永遠自己有自己講，唔理人哋！”

鄧建明就笑言年底太極騷圓夢，希望飲住酒開騷：“因為是在西九舉行戶外騷，大家睇住個日落，飲返兩杯聽我哋唱歌，氣氛一定正！我哋四面台做過、紅館又做過，今次終於可以成萬人陪我哋睇日落，希望唔會唱吓唱吓飲醉咗啦！”