胡定欣落實返無線拍新劇

胡定欣昨日為健康產品拍攝廣告，對於要與一名九個月大的BB合作，早前榮升姑媽的定欣笑言無難度：“弟弟的BB只有四個月大，我有幫手湊及餵夜奶，從中感受到做母親的偉大。”

停產兩年的定欣，近日有傳決定重返娘家發展，昨日她說：“依家同無線的合約已傾到尾聲，將有明確方向時候便會公佈。但年底肯定會拍《白色強人2》，我都好期待。始終覺得無線平台帶給藝人好好的機會，大家會保持關係。之前有兩年無拍劇，但就有充裕時間休息儲好能量再出發。（市道唔好唔敢外闖？）每個階段都有唔同諗法，都要睇大環境，要選擇諗清楚之後工作方向。觀察和思考一段長時間後，是時候落實決定。（不會簽古天樂？）我覺得有新決定、有明確方向，個心才會定下來。”

對於舊愛馬國明與湯洛雯拍拖，定欣表示：“好替他們開心，郎才女貌，祝福他們。但未有專登傳短訊恭喜，見到面先啦。”定欣透露今次和馬明在新劇《白色強人2》的對手戲多過上次：“對上一次合作已經是三年前的事，所以甚為期待。”