昨夜賽總投注逾四百十四萬

余健雄直落中三元

昨晚沙地賽事完結。是晚出馬較疏落，場面冷清。六場總投注四百十四萬四千元。

頭場七駒角逐賽果開正路。馮耀正廄“量子力學”由安萬堯押陣，埋門殺上挫敗大熱門“火星代表”，替馬匹取得服役後首W。“量子力學”季內屢拼不出頭。今於處女馬場合，贏在出賽多次已有作戰經驗。且安萬堯騎來發揮水準恰到好處，埋門後上險勝對手，人馬此役贏得漂亮。馮耀正、安萬堯攜手先拔頭籌。

第二場余健雄贏譚廄“大魔頭”。此雙人馬季內曾有不俗戰功，但近期上陣旨在減分。上次草地敗後轉沙再來，吼準形勢出擊，埋門挫敗大冷馬“耀新之星”，順利勝回一仗。“大魔頭”同余健雄夠夾檔，今次贏來無懈可擊，替馬房建一功。

第三場余健雄起孖。此子贏完“大魔頭”手風轉順，是場騎謝貴全廄“金槍霸”以大熱姿態再下一城。此雙人馬上次贏完即休養生息，唞夠後重上征途。今於一二班混合賽遇上快馬不多，出閘應聲彈出，全程自造步速，一氣呵成帶返，贏來無驚無險。“金槍霸”沙地悍將同余徤雄最合拍，服役至今未脫過三甲，堪稱最佳拍檔。謝貴全喜添一W，騎者有孖寶見面。

第四場原本七駒角逐，但“喜晉”閘前退出，買少見少。余健雄於二、三場起孖後氣勢正盛，是場騎譚廄“寶寶”快放中三元。此駒近期無甚建樹，上次田中正一跑千八米得第三。今次轉沙再戰，換上余健雄發揮水準不同，出閘搶放直帶到尾，五倍冷門替譚廄完成孖寶任務。余健雄是晚一口氣直落取得三元進帳，收穫甚豐。

第五場輪到高君濤贏番一場。此子前四場無頭馬進帳，跑至此場騎浩廄“濠駿”出閘快步搶先，全程領放直奔終點，贏來全無壓力，替馬匹勝回一仗。跑完變大熱，獨赢不足兩倍，被人大注扑中。梁國浩廄喜添一W，騎練合作愉快。

尾場浩廄贏“創投精英”。此駒上次中野省吾跑短途拼得梗頸四。今次原配增程再戰，騎者不敢怠慢，直路透出帶返終點，替馬房建功。浩廄是晚起孖食尾餬。中野省吾應記一功。