火星代表來者不善

今晚上演六場沙地賽兼轉播八場南非馬。外地馬打頭陣六點五十分開跑，本地馬頭場七點○五分響鑼。騎師陣容除恩利克停賽一日，其餘續由原班人馬上陣。各場出馬疏落，但形勢暗湧甚大，馬少場合爆冷成慣性，投注宜臨場執生。

筆者心水推介，第一場未勝出馬一○五○米，陳俊輝廄“火星代表”可做馬膽。此駒季內至叻跑入二、三名。時至季尾，練者極欲替牠贏馬。今次扳到高君濤操刀可謂來者不善，冀贏馬打開勝利門。

“火星代表”論質不高，但宜沙宜草，同程有入位紀錄。今次配強出擊，應有諗頭。此駒饒有速度，放頭跑試過闖入連贏，鬥後勁亦具瞄頭。近幾仗無功而退，看騎者跑法似無心攻堅，敗不為據。拚後重新打磨，周二晨操高君濤親試一課，務求摸準馬性。今次操好而臨，遇同組對手寥寥無幾，形勢大好，值得優先考慮。